قلب الرجل

يازين لاتلفت عيونٍ معاطيش= أبعد عن العطشان لاتقتلينه

ولاتفتحين إجروح منتوفه الريش= وجرحٍ بجوفي إحذري تجهلينه

القلب ماهو كالقلوب الهشاهيش= قلب الرجل يابنت لاتخسرينه

مالك ومال اللي معادله العيش =اللي همومه بين طينه وطينه

جرحه عميق ولاتجيه المناقيش =ويابنت عسرٍ بالدواء تاصلينه

الهم يكبر والأمل غاديٍ طيش= وأمست همومه فايقات إلسنينه

دنياً بها عشنا وشفنا الخرافيش= صارت صقور وعلمنا تعرفينه

حتى الدواب اليوم صارت منافيش= وتبدي كيانٍ كلهم سارقينه

مالك على دربي يدينك مقاويش=كني وليفٍ من زمن تفقدينه

أنا صعيب محرمٍ للعراميش= سبعٍ طعامه من مكاسب يدينه

ماني بمثل فلان هيشٍ ولد هيش= ولا أرضى على نفسي تسمى الرهينه

في منزلٍ لو ينرمي بالمقافيش= صعب على الرامي برميه يهينه

وصدق المشاعر للعذارى محاميش= لاكن عز الرجل يقهر حنينه

وحنا الرجال اللي نهار المراقيش= ناطا على الهزله وناطا السمينه

وأهل الفعول اللي مايقدر لها الديش=اللي عزومه ماتهوز الثمينه

حنا الذراء والستر يأم العكاريش= ومهابةٍ عدوها للغبينه

ولانستمع فالنمنمه والتحاريش= وراع الحكي يترب ويترب معينه

وهذا جوابي جاك من دون تشويش= من هاجسٍ يقول لاتقربينه

 

الشاعر

فواز علي الروقي